Азаматтық құқықтарды қорғау – жалпыға ортақ міндет
2021 жылдың 23 сәуірінде Қазақстан Республикасындағы Бала құқықтары жөніндегі уәкіл Аружан Саин Әлеуметтік жобалар форумы шеңберінде өткен «Азаматтық құқықтарды қорғаудағы мемлекет пен КЕҰ арасындағы ынтымақтастық» атты панелді онлайн-сессияға қатысты.
«Мемлекет, бизнес және КЕҰ: тұрақты даму мүддесіндегі бірлік пен әріптестіктің 30 жылы» ұранымен өткен форум – қазақстандық және халықаралық сарапшылар екі күн ішінде ең өткір әлеуметтік, экономикалық және экологиялық мәселелерді талқылап, сондай-ақ нақты практикалық шешімдерді ұсынатын онлайн-алаң.
Белгілі журналист, Aitube.kz видео-порталының бас редакторы Ерлан Игісінов модераторлық еткен «Азаматтық құқықтарды қорғаудағы мемлекет пен КЕҰ арасындағы ынтымақтастық» тақырыбындағы панелдік сессияға беделді спикерлер жиналды: Халықаралық институттар атынан БҰҰ-ның Орталық Азиядағы адам құқықтары жөніндегі бюросының аймақтық өкілі Ришард Коменда, мемлекет атынан – Әділет вице-министрі Ақерке Ахметова және Қазақстан Республикасы Парламентінің депутаты, Мәжілістің Халықаралық істер, қорғаныс және қауіпсіздік комитетінің мүшесі (төменгі палата) Ерлан Саиров, азаматтардың – ересектер, балалар және мүгедектер атынан – Жеміс Тұрмағамбетова, «Адам құқықтары үшін хартия» ҚҚ атқарушы директоры, ҚР президентінің жанындағы адам құқықтары жөніндегі комиссия және ҚР Президентінің жанындағы Ұлттық қоғамдық сенім кеңесінің мүшесі, Аружан Саин, Қазақстан Республикасындағы Бала құқықтары жөніндегі уәкіл, «Милосердие» ерікті қоғамы» ҚҚ құрылтайшысы және Алмаз Ержан, «Атамекен» ҚР Ұлттық кәсіпкерлер палатасы төрағасының кеңесшісі сөз сөйледі.
Әңгіме нақты әрі құрылымды болып шықты. Модератор мемлекетті басқаруда ымыра мен максималды жетістікке жету үшін атқарушы билік пен коммерциялық емес ұйымдардың (КЕҰ) өзара ынтымақтастығының маңыздылығын атап өткеннен кейін, Коменда мырза сөз сөйледі, ол Қазақстан басқа елдермен бірге экономикалық, әлеуметтік және мәдени құқықтар туралы халықаралық пактінің ережелері бойынша өз міндеттемелерін толығымен орындауға міндетті екенін еске салды.
Оған қарсы пікір білдірген Саиров мырза «Митингтер туралы заңды» («Қазақстан Республикасында бейбіт жиналыстарды ұйымдастыру және өткізу тәртібі туралы» ҚР Заңы) әзірлеушілер мен парламентарилер қандай кедергілерге тап болғанын атап айтты. Тұрмағамбетова ханым осы және басқа да әлеуметтік үдерістерде Ұлттық кеңестің маңызды рөлін атап өтті. Ержан мырза әлеуметтік заң жобаларын әзірлеуде мүмкіндігі шектеулі азаматтарды белсенді түрде тартуға кеңес берді. Ал Балалар омбудсмені КЕҰ мен мемлекет арасындағы тиісті байланыстың жоқтығына назар аудартты. Вице-министр ханым қорытындылай келе, Әділет министрлігі КЕҰ бастамаларын жан-жақты қолдауға дайын екенін айтты.
