Әлеуметтік серіктестік: Брюссельде Еуропалық Одақ пен Қазақстан ынтымақтастығы талқыланды
2024 жылдың 22 ақпанда Қазақстанның Бельгия Корольдігіндегі Елшілігінде Еуропалық Одақтың халықты жұмыспен қамту, еңбекті қорғау және әлеуметтік қорғау мәселелері жөніндегі сараптама орталығы (SOCIEUX+) Қазақстанда соңғы жылдары жүзеге асырған жобалары туралы презентация жасады.
Іс-шараға Орталық Азия, Әзербайжан және Моңғолия елдерінің дипломатиялық миссияларының өкілдері шақырылып, олар еуропалық сарапшылармен SOCIEUX+тің техникалық ынтымақтастық мүмкіндіктерін талқылады.
Кездесуге бұрынғы Қазақстан Республикасындағы Бала құқықтары жөніндегі уәкіл Аружан Саин қатысты. Ол көп жылдар бойы өз қызметін әлеуметтік қамсыздандыру және бала күтімі жүйесі мәселелеріне арнап келеді. Іс-шараның күн тәртібінде Қазақстанда кәсіби патронаттық отбасылар институтын енгізу мүмкіндігі де сөз болды.
Бельгия Корольдігіндегі Қазақстан Елшісі Марғұлан Баймұхан іс-шараға қатысушыларға SOCIEUX+тің Қазақстан аумағында жүзеге асырған жобалары туралы айтып берді.
«SOCIEUX + соңғы жылдары қазақстандық ұйымдармен, оның ішінде Бала құқықтары жөніндегі уәкіл институтымен, Азаматтық бастамаларды қолдау орталығымен, Еңбек ресурстарын дамыту орталығымен, Астана қаласының жұмыспен қамту және әлеуметтік қорғау департаментімен, сондай-ақ Экономикалық зерттеулер институтымен ынтымақтастықта жемісті нәтижелерге қол жеткізді. Қазіргі кезде бұл Орталық Қазақстанда әлеуметтік қорғауды, еңбекті қорғауды және халықты жұмыспен қамтуды жақсарту саласында 5 жобаны сәтті аяқтады», – деп атап өтті Марғұлан Баймұхан.
«ДОМ «Милосердие» қоғамдық қоры коммерциялық емес ұйым ретінде әрекет ете отырып, әлеуметтік жетімдіктің алдын алуға және жетімдер үйіне түсетін балалардың санын азайтуға бағытталған іс-шараларды сәтті жалғастыруда. Сарапшылар әлеуметтік қорғау, еңбекті қорғау және жұмыспен қамту аясында Қазақстанның мемлекеттік органдарымен техникалық ынтымақтастық тәжірибесімен бөлісті.
«SOCIEUX+ қорымен, Сыртқы істер министрлігімен, әсіресе Қазақстанның Бельгиядағы, Брюссельдегі дипломатиялық миссиясымен өзара әрекеттестік пен ынтымақтастық үшін, сондай-ақ Парламентте кәсіби отбасы институтын енгізу туралы заңды қарау аясында тиімді коммуникациялар құрғаны үшін алғыс айтқым келеді. Чехияға барып, кәсіби отбасы институтының практикалық жұмысымен және баланың отбасында өмір сүру құқығын қамтамасыз етуге бағытталған басқа да жүйелермен танысуға мүмкіндік алғанымыз үшін ризашылығымды білдіремін», – деді Аружан Саин.
SOCIEUX+ өкілі Маржена Бреза Орталық Азия, Әзербайжан және Моңғолия елдерімен техникалық ынтымақтастық мүмкіндіктерімен таныстырды.
«SOCIEUX+ жұмыспен қамтудың инклюзивті, тиімді және тұрақты стратегиялары мен әлеуметтік қорғау жүйелерін әзірлеу, басқару және бақылау мүмкіндіктерін кеңейтетін қысқа мерзімді миссиялар мен іс-шаралар арқылы мемлекеттік мекемелердің мамандары арасында білім мен тәжірибе алмасу құралы болып табылады. Соңғы 2 жылда біз Қазақстанмен белсенді ынтымақтастық орнаттық және жаңа елдерде әріптестер желісін кеңейтуге мүдделіміз», – деді Маржена Бреза.
Іс-шара барысында әлеуметтік сақтандыру, әлеуметтік көмек, еңбек және жұмыспен қамту, оның ішінде жинақтаушы зейнетақы, медициналық сақтандыру және еңбек жағдайлары мәселелері талқыланды. Кездесу соңында тараптар Қазақстан Республикасындағы әлеуметтік бағдарламалар мен қызметтерді жетілдіру бойынша ынтымақтастықты тереңдетіп, тәжірибе алмасуды жалғастыруға ниет білдірді.
«SOCIEUX+» – серіктес елдердегі әлеуметтік қорғау, еңбек және жұмыспен қамту салаларындағы институционалдық әлеуетті нығайтуға бағытталған Еуропалық Комиссияның бастамасы.
